我是一ê台北gín-á，細漢ê時雖然厝內攏講台語，總是出去外口佮厝邊ê朋友chhit-thô，聽--著ê主要lóng是華語，久--來，台語漸漸生疏，變做會曉聽bōe曉講。
讀大學ê時，頭前三冬iah-koh是戒嚴時期，m̄-koh彼陣已經有一kóa接觸反對運動ê機會。政治議題可能khah迷人，吸引khah chōe人投入，我個人接觸政治議題了後，漸漸感覺文化才是主要ê根底，語言koh是文化ê基礎，萬一語言無--去，就啥物lóng免講。另外，我感覺頂一沿--ê，in ê台語能力比我加足好，m̄-koh mā是khah輸頂兩沿，思考原因，感覺使用機會變少是主要ê問題，無用文字表記是koh-khah嚴重ê致命傷。
了後，我開始kā台語學--轉來，就算hō͘人笑mā無要緊，只要敢講，就會有人糾正你講m̄著ê所在，有開始講就有進步。Koh無gōa久，我開始烏白寫台文，彼陣真正是烏白寫，除了漢字佮KK音標，連ㄅㄆㄇ、カナlóng kā提來鬥，寫規半冬了後，有一位做歌仔冊研究ê前輩kā我講，教會有一套羅馬字系統，你會使試看māi。
我走去圖書館chhē著鄭良偉教授編ê白話字教材，借轉來厝--ê，利用時間掀掀看看leh，差不多4工kā伊學--起來。除了感受著白話字ê魅力，後--來mā透過白話字熟似chiâⁿ chōe台語文ê朋友。
雖然一步一步按呢行出一條路，m̄-koh mā是真孤單，你就kan-na一隻孤鳥，無啥人願意hām你講台語，就算你ê朋友真勉強看有你是teh寫siàⁿ，mā bōe tè你寫台文，彼陣iah m̄是網路時代，咱感覺咱拍拚ê成果足有限。
大學ê時，我kah朋友發起成立台大掌中劇團，成立ê時我已經大學四年，我tī社團內想beh sak家己寫劇本，mài koh kha̍p-bōe-tio̍h就搬中國戲，劇本愛用台文寫，所以愛逐家先學台文，總是後--來並無成功。
1991年創刊ê《台文通訊》，對彼時台語文運動，有真大ê影響。
彼時，一kóa學校開始成立台語文相關社團，我tī清華讀研究所，先入台灣研究社，參交大台灣研究社對台文有趣味ê朋友做陣聚會、讀台文，後來阮聯絡各校相關社團，包括台大、成大、淡江、實踐等等，成立跨校ê學生台灣語文促進會，逐家互相交流khah有伴，mā khah行會落去，總是這款社團tī學校m̄是主流，人數bōe chōe，有時其中一屆ê社團幹部畢業，後壁ê人無接--起來，隨時有倒社ê危機。
學生社團無穩定，《台文通訊》就無仝款，雖然是tī美國發行，m̄-koh台灣有聯絡處，伊維持運作，tī台灣各地辦讀冊會，辦徵文比賽，而且提出議題hō͘咱思考，親像台語消費者運動等等，kā台語文運動絞--起來。
我是理工背景出身，頭殼khah tēng，台語文khang-khè成做一生ê志業了後，想著啥物是會當去做--ê，就規心蹽--落去，無去考慮後果，mā khah無戰略思考。《台文通訊》就無仝，透過刊物ê發行，tī各所在箍人，hō͘規ê台語文運動koh-khah深入、koh-khah闊面。
Tī彼ê tú-á解嚴無gōa久，各種政治社會運動開始大發展ê時代，語文運動相對khah少人來關心，m̄-koh這是台灣人認同bōe-tàng欠缺ê一塊，失去語言，早慢就會失去文化，失去一切。《台文通訊》tī彼ê關鍵ê時陣，規心推sak語文復興運動，想bōe到mā已經30冬--ah。30冬來，雖然tī資源真有限ê情形下，可能咱mā m̄敢講做了有gōa成功，總是咱盡力營造台語文環境，保留台灣人ê語文尊嚴，仝時陣，mā tī chia熟似真chōe拍死無退堅心為台語文ê友志，咱希望這ê力量會當繼續，mā 一直傳承落去。