台語白話字翻譯文學

雖然真濟台灣人m̄知影，抑是感覺伊看無，台語有一个重要ê書寫系統是白話字（台語羅馬字）。

1885年tī台南發行《Tâi-oân Hú-siâⁿ Kàu-hoē-pò》（台灣府城教會報，這馬叫做《台灣教會公報》，以下簡稱《教會公報》），伊是tī亞洲發行ê第二份報紙，用書寫台語口語ê白話字來發行ê。彼陣中國猶無報紙，第一份報紙因為已經停刊，所以《教會公報》是亞洲發行上久ê報紙。這是台語足大ê驕傲，雖然真濟講台語ê人m̄知影抑是無去看重這段歷史。用現時ê狀況來做比喻，電腦網路時行了後，早期叫做Web 1.0，後來進步到Web 2.0，因為Web 1.0時代，內容提供愛倚靠是有資訊技術ê人，提供ê內容相對有限、khah單方面，到Web 2.0，逐家lóng會使是內容提供者，提供家己ê智慧。彼个時代，漢字就親像Web 1.0，漢字書寫（其實大部份漢字書寫kah台語無牽連）lak tī少數人ê手頭，若無就是tēng-khiàu-khiàu ê官方觀點ê文件，白話字是Web 2.0，真濟會曉白話字ê人lóng會當寫出伊ê觀點。可比講1888年12月《教會公報》所寫ê，發生tī這馬花蓮富里ê大庄事件，代誌按怎發生，官員走去山頂bih，A-mî-á 來搜[chhiau]山，攏總寫4張，故事情節活跳跳；若轉去péng《花蓮縣志》對大庄事件ê描寫，短短7 choā，白chiáⁿ無味。

除了《教會公報》，mā有一寡冊是用白話字書寫，親像《Sèng-keng》（聖經）、《Lāi-gōa-kho Khàn-hō͘-ha̍k》（內外科看護學）、...等等，無限定tī宗教議題。

翻譯學是一門khah新ê學科，m̄-koh翻譯ê歷史已經真久，而且翻譯會使講是一門遺憾ê藝術，因為beh按怎予讀者了解伊無經歷過ê代誌iah是異文化，譯者需要好好仔斟酌，到底是beh忠實原文，一字一句照字面翻寫過來，iah是beh用khah淺白好理解ê方式來翻寫，甚至是改寫、重寫。

咱若看《教會公報》內底白話字翻譯ê文本，會當看著頂面所講著ê各種翻譯手路。

一般te̍k來講，「翻譯」袂予人當做一个文類(genre)來處理，m̄-koh對彼个tú-á beh ùi大部份人m̄ pat字ê社會環境過渡到利用文字來表達感情、認pat世間ê事事項項，翻譯ê文本所提供ê，可能是天外天ê世界ê描寫，可能是當時toà tī台灣ê人一世人lóng m̄ pat想過ê代誌kah問題，對智識ê開拓，諒必有足大ê貢獻，透過白話字來讀遮ê翻譯文學，等於是gia̍h著一支鎖匙，這支鎖匙會當kā通向新世界ê大門拍開，予咱開眼界。

白話字是傳教士為著傳教ê需要，所編製、採用ê文字系統，所以白話字翻譯文學ê文本，有部份kah宗教有關係，〈Si̍t-tián-má〉(1899) 是用德國畫工ê故事來宣傳耶穌精神ê宗教故事； 〈Ngá-kok khì kìⁿ-tio̍h Lú-ông（雅各去見著女王）〉(1890) mā是宣揚宗教ê題材； 〈Nn̄g ê Kúi（兩个鬼）〉(1900) 是解破對鬼ê觀念ê宗教短文；〈Tiâu-kìⁿ Kok-ông（朝見國王）〉(1911)用英國ê故事來宣教；〈Cha̍p ê kò͘-sū（十個故事）〉(1913) 用幾个小故事來說明宗教教理；〈Ông ê Khàn-hō͘-hū（王ê看護婦）〉(1918) kah 《Hàu-lú Tē-cha（孝女Tē-cha）》(1925)是宗教長篇小說；〈Iú-bī tóan-giân（有味短言）〉(1932) khioh聖經章節ê文句來引做故事。

世間上發行量上大、讀ê人上濟ê《Sèng-keng（聖經）》當然袂使kā làu-kau，到taⁿ為止，其中，巴克禮(Barclay)聖經(1933)是上濟人讀ê台語聖經，m̄-koh有人認為伊廈門話ê成分khah濟過台灣話，內底ê部份語詞tī台灣社會並無通用，紅皮聖經(1972)是基督教kah天主教合作，以台中ê腔口來翻譯，總是彼陣正當是國民黨政府全面禁止羅馬字使用ê時陣，結果紅皮聖經猶閣tī印刷廠ê時陣就予警總抄去，大部份ê台灣人攏無機會讀著，這是足拍損ê一段往事。

Koh有一寡是ùi漢字ê文本翻寫做台語ê，親像〈Ín Ka Tòng tō（引家Tòng道）〉(1890)、〈Cheng-seⁿ ê phì-jū（精牲 ê 譬喻）〉(1898)、《Tang-hng ê kò͘-sū（東方ê故事）》(1916)、…等等。對台語文ê角度來看，只要m̄是書寫台語ê文本，lóng是外文，大部份ê漢字文本是外文，包括「孔子字」（指文言文）kah「唐人字」（指khah倚現代華語ê白話文）。

有一寡是世界各所在ê故事抑是作品，先看歐洲，包括，《An-lo̍k-ke（安樂家）》(1890)是早期兒童文學ê重要作品；〈Gín-á kap Chiáu（囡仔佮鳥）〉(1921)是挪威ê譬喻故事；〈Lōng-tōng Chú（浪蕩子）〉(1900) 是英國浪子回頭ê故事；〈Thâng Tòng Hóe-chhia（蟲擋火車）〉(1914) 是英國ê譬喻故事；《Gûn Peng-ôe（銀冰鞋）》(1947)是美國作家以荷蘭做背景所寫ê故事；〈Thô͘-thòaⁿ-á（塗炭仔）〉(1915) 是逐家攏真熟ê德國格林童話「灰姑娘」ê故事改寫；〈Chi̍t tiâu sòaⁿ（一條線）〉(1928) 是法國ê譬喻故事；〈In Gī lióng-chôan（恩義兩全）〉(1886)用古希臘國ê故事來寫啟發性ê道理；〈Lông-hu Lia̍h-tio̍h Ho̍h（農夫掠著鶴）〉(1928) 是希臘 ê譬喻故事；〈Tang-thiⁿ Chhì-pho（冬天刺波）〉(1896) 講天主教tī地中海ê島嶼所發生ê代誌。

離開歐洲，koh有〈Ióng-kám ê Lông-hu（勇敢ê農夫）〉(1921) 是非洲ê譬喻故事；〈O͘-lâng ê lāu-bú--Má-lī Bi̍t-tek ê Su-lé-sa（烏人ê老母：Má-lī Bi̍t-tek ê Su-lé-sa）〉mā是非洲ê故事，強調女性ê力量；〈Chīn-tiong kàu sí（盡忠到死）〉(1890) 用美洲ê故事來說明做人ê義理；〈Hóan-tùi lim-chiú ê lú êng-hiông Ná-sùn（反對lim酒ê女英雄：Ná-sùn）〉(1958)是美國ê故事。到遮，世界已經se̍h beh一lìn a。

Shakespeare（莎士比亞）是英國文學重要ê作家，伊ê作品，咱當然mā愛kā看重，1950 ê《Venice ê Seng-lí-lâng（Venice ê生理人）》就是翻寫Shakespeare ê作品。

白話字ê翻譯文學，數量算起來袂少。可惜因為政治ê壓迫，1970、1980年代規个白話字書寫衰微落去，到1990年代本土意識開始giâ頭ê時，就以漢羅合用為主，台語文書寫展現另外一款景緻。雖然這段時間，koh有少數ê白話字翻譯文本出現，親像5%台譯計畫內底ê其中幾本，總是數量上已經chiâⁿ少a。

後擺會按怎演變，咱無一定算會準，總是白話字書寫所留落來ê文本，絕對是台語ê寶藏，而且無thang取代。