1
（日記，1987年7月17號，去彰化二水參加「快樂農家體驗營」第二工。）
半暝足涼ê，一直精神。四點半左右，天已經phah-phú光，tō peh起來四界行行leh。路上若tú著o͘-jí-sáng iah是o͘-bá-sáng ê時陣，in lóng會 kah你相借問。
後來行田岸路，行 kàu 一間厝頭前，看著一个 o͘-jí-sáng， hâm 伊相借問了後tō tiàm hiâ 開講起來a。伊姓陳，七十thóng歲，in後生lóng去北部食頭路，chhun 伊一人tiàm chiâ 顧芎蕉園。本chiâⁿ kan-na凊彩開講開講 niâ，m̄-koh講無外久，伊隨講對南洋戰爭去。可能是我台語程度 khah bái，伊mā khah有歲a，講話koh有小khóa 漏風，伊講ê我並m̄是lóng聽有，而且講話koh一直重覆。
伊講，二水鄉tī日本時代號做二水庄，全庄有11人hông調去南洋做兵，lóng有轉來。In駐守ê所在（無聽清楚）地勢好，美軍phah bōe起來，若無tō是船去tiâu tī 海港外口。
我問伊糧食敢有充足？伊講自本一直lóng無問題，尾a chiah有khah欠， m̄-koh部隊家己有tih種作。我koh問伊終戰了後按怎轉台灣ê？伊講終戰無gōa久tō hông 載轉來a 。
伊tī台灣ê時，受過六冬ê教育，後來hông調去做兵。Tī 伊ê印象中，日本ê大官人lóng bōe bái， tiāⁿ-tiāⁿ會kā部下講，日本人受ê教育khah 好台灣人，所以日本人愛kā台灣人當做親小弟來疼thàng，台灣人若有bōe 曉ê所在著愛有耐心kā教， m̄-thang phah、m̄-thang罵。M̄-koh有ê日本兵tō真愛欺負台灣兵，啥物代誌lóng叫台灣兵做，家己m̄動手，害伊氣kah有一擺tō走離開伊ê小隊轉去總部，總部ê人kā伊lia̍h 起來，beh kā 伊當做逃兵來處置，伊tō kā in講，假使我真正beh soan，哪會koh走來總部？Tō是因為台灣兵hông欺負kah夠夠。
伊講伊身體真勇，會tàng 做真chōe粗重ê khang-khè，交 hō͘ 伊ê khang-khè lóng會tàng提早完成。Tī hiâ死去ê戰友，大部份lóng是破病死ê。伊koh講hit時陣全台灣kan-na一个少將，kah這má無kāng款。
6:10左右 tn̄g著伊，一直聽伊講 kàu 6:40，因為beh趕7:00轉去食早頓，只好將伊ê話 phah 斷，感覺歹勢歹勢。
我真後悔我無chhôan 錄音機，m̄-koh 實在太過突然。Tī這進前，我對南洋戰爭ê了解是ùi李喬 ê 「寒夜三部曲(三)孤燈」來ê。聽這个 o͘-jí-sáng講了後，我對南洋戰爭開始有感覺，hō͘ 我清清楚楚意識著，台灣人為著這場戰爭付出代價，四十幾冬前發生ê代誌，是按怎伊一直bōe-tàng放bōe記， koh是按怎咱ê課本無beh向咱提起？
2
（日記，1988年2月初4去南投集集參加農權會所舉辦 ê「農村生活營」，2月初6 kah林兩人hông 分配去苗栗卓蘭，kah果農tòa 做伙。我特別問主人，敢有親情pat hō͘ 日本仔調去南洋？伊講有，2月初10早起chhōa 阮去chhē伊，m̄-koh伊無tī leh，10點外ê時陣伊家己騎o͘-tó͘-bái來主人 chiâ，tiàm chiâ向阮講起這段往事。）
伊姓蔡，今年七十一歲，客人底，客語、台語lóng會曉，溝通ê時用台語（因為阮bōe曉講客話）。無錄音是我siōng大ê錯誤。
伊二十七歲ê時hông lia̍h去做軍伕，卓蘭有三十个去，新竹州ê軍伕 lóng先tī新竹集合，了後也無訓練，就送去高雄坐船出港，坐三暝三日kàu 馬尼拉，tiàm hiâ停留兩工，koh坐船去Ma-to͘-kha-li，這算是一个大島，in tī Ma-to͘-kha-li邊a ê小島Lun-pho͘-lu tòa，tī hiâ做工，整理機場。
Tī Lun-pho͘-lu tòa差不多一冬，伊hông編tī第九伙。後來啄鼻仔（美國人）phah 過來，這pêng ê飛行機連飛都飛bōe起來，無啥phah就輸輸去，走入山內，無thang食，食鹿角草。In 百外人做伙，有當時仔幾lō个人半暝仔出來偷 the̍h 倉庫ê物件，啄鼻仔mā會tī 一kóa所在 khǹg 糖仔、牛肉罐頭，in mā會khioh著啄鼻仔ê傳單，傳單ê內容lóng是叫in出去投降 ê，m̄-koh in lóng m̄敢出去投降，因為hit當陣仔日本人有kā in講，假使hō͘ 啄鼻仔lia̍h去，in會kā你tok做肉醬。
我問伊對日本仔 ê 印象是好 iah是bái？伊講 chiâⁿ bái，hit陣分配一人一包米ê時陣，日本人in先分，搶好ê去，chhun ê chiah hō͘ 台灣人分，一个人差不多kan-na chhun半包。
In kā hiâ ê住民叫做「烏道番仔」。因為in來chiâ了後破壞烏道番仔 ê田園，所以烏道番仔真怨恨in，in tī山內siōng 驚ê就是tn̄g著烏道番仔，烏道番仔會用長鏢射人，koh射了夭壽準，實在是足 khiàng ê。後來啄鼻仔 kā烏道番仔講lia̍h活ê會tàng領三十箍ê美國錢。無gōa久伊就hông lia̍h 去，五、六個月了後，hông 送去Hô͘-siú（和州，伊講是美國西太平洋ê一粒小島）。Hông lia̍h去ê lóng關tiàm hiâ ，台灣人一區、義大利一區、獨逸（德國）一區、日本一區、朝鮮一區。
我問伊對啄鼻仔kah日本仔tó一个 印象khah好？伊講是啄鼻仔，tih 替日本仔做代誌ê時陣，做無好tō phah，啄鼻仔tō chiâⁿ惜咱，bōe kā咱 phah，但是hông關ê時陣，mā是足ǹg望日本派兵來救。日本仔hit區pat 反過啄鼻仔，結果hông thâi死千外个。Hit陣in穿ê衫褲lóng是紅色ê，大概是按呢khah hiáⁿ目，chiah khah無法度逃走。衫褲是一間一間khǹg ê，一間khǹg衫，一間khǹg褲，一間khǹg帽仔按呢，beh穿ê時陣，一間去hiaⁿh一領，真趣味。Hiâ ê台灣人差不多有一千个，五十个 一堆，hō͘ 三个 啄鼻仔來管。伊講，台灣人siōng猴，真歹，pat有人用做khang-khè ê iân-pit將啄鼻仔hám落去， hám hō͘ 死。後來，每五十个台灣人tō有五十个烏道番仔兵來管。
Hit陣若有做khang-khè，主要是挽tho͘-má-tò͘，有工錢一kà銀，in hit陣khah愛出去做khang-khè，比關tiâu-tiâu khah好。
Iah未hō͘ 啄鼻仔lia̍h著ê時陣，啄鼻仔有派奸細來，是日本仔，講伊 beh轉去，若有beh寫批轉去ê，會使寄伊 the̍h 過去，真chōe人lóng寫，按呢啄鼻仔就知影有啥物人tòa tī tó位。
Tī hiâ lóng總做兩冬外，日本投降了後koh繼續做一段時間，後來 chiah坐船轉來基隆，m̄-koh這是日本 ê 船，m̄是中國ê船。三十个人去， chhun二十三个轉台灣。
伊講beh去南洋進前，坐船beh離開台灣hit時陣，有醫生tih做檢查，看有漏屎bô？若是有tō會使免去南洋，hit陣真驚kho-joe-la（霍亂）。伊講 hit陣若是知，kah醫生串通一下，請伊開一个證明，tō 會使免hông調去。
我問伊離開卓蘭ê時陣，西坪（卓蘭ê一个地名）是m̄是已經有軍用機場？伊講iah無。伊講啄鼻仔知影in tòa tó 位，lóng會kā in問口供，問in看知影有啥物軍事設施bô？啄鼻仔tō有問伊西坪軍用機場ê代誌，伊kā in 講確實是m̄知，啄鼻仔hō͘ 伊看in去hip ê地圖，用飛行機hip ê，日本仔有啥物設施啄鼻仔lóng chiâⁿ清楚，實在有夠厲害。伊khah早讀公學校kan-na 讀一冬就無 koh再繼續讀落去，tī厝ê種田，一直kàu hông調去南洋。我 kā伊講我真關心有關台灣歷史ê物件，特別趁這个機會向你問起有關南洋戰爭ê代誌。伊講，若準beh講，幾lō工mā講bōe soah。伊講伊有一个朋友 tòa台南，千外个去，kan-na chhun伊一人轉來，in小弟mā有去，小弟做隊長，後來伊ùi頂kôan tàn石頭kā in小弟teh死。故事足chōe ê，講也講 bōe soah。
Kā伊說謝，十一點thóng，伊騎o͘-tó͘-bái離開。
3
（日記。我做兵ê時chiah聽媽媽講起，四叔公hit陣mā hông調去海南島。退伍了後無幾工，我tō緊去chhē伊，1990年7月初9去kàu in tau。）
四叔公kā我講，伊真歡喜有人來關心這kóa代誌。伊去海南島四冬， hit陣根本無認為日本會戰敗，紀律lóng真好。Ta̍k 工暗頓食飽tō集合，一个 一个kā你摃尻川，目的tō是 beh hō͘你保持緊張ê心，m̄-thang放鬆。若是出去phah，lóng是少尉chhōa頭，兵仔tī後壁，bōe講兵仔phah頭陣，軍官tè後壁。
對兵仔ê照顧mā真好，hit pêng落ê雨比咱ê這pêng ê西北雨khah 大陣，ak kah規身軀lóng tâm去，轉來了後隨hō͘你換，bōe kā你刁。In hit pêng ê風俗是結婚了後三工，新娘tō轉去外家，若有身，翁婿chiah kā伊chhōa轉來。八月十五（中秋）hit工，不管有結婚無結婚ê，lóng會使出來，無人會管，in兵仔kàu hit工，lóng穿台灣衫，出去亂。
終戰了後，in 無船thang轉來，日本仔講，以後恁是中國人， m̄是日本人，恁ê代誌阮無愛管；寫批kā中國政府講，in ê回覆是：台灣已經是中國 ê，既然lóng是中國，恁tī海南島phah拚mā是kāng款。兩pêng lóng無 beh chhap in。
結果是有一隻日本船歹去，送去越南修理，載in轉高雄（1947年年初）。身軀連半sián錢都無，tō用軍用罐頭kah老百姓換食ê物件，ùi高雄勻勻仔行轉來台北。
Kàu台北ê時陣sán kah chhun一支骨，m̄ 敢轉去厝ê，去阮阿公 hiâ，hit陣是半暝，peh樓梯peh kah siōng後一層ê時已經peh bōe起li a ，tō hoah：阿忠（阮阿公）、嫂 a，開門哦！ In也 m̄ 敢開，是人是鬼都m̄ 知...... 四叔公講點外鐘，暗時十點左右離開，我講另工有機會 chiah koh 來一擺，將一kóa代誌問khah清楚leh。
（後來伊無等我koh去chhē伊，tō破病、過身......）
4
（清華海報牆頂面ê海報，1992年4月初9 kàu 4月16。）
終 戰 ê 賠 償
台語文讀寫班，這遍beh讀李雙澤ê遺作「終戰ê賠償」（台語版），是有關南洋戰爭ê故事。
Tī日本ê統治下，台灣人真m̄甘願，投入了這場師出無名ê戰爭，不明不白，犧牲chōe-chōe ê性命。
終戰了後，朝鮮真積極tih向日本政府爭取賠償，尾a， tī 1965年爭取著一人350萬日幣ê賠償。台灣這方面，tī日本ê台灣獨立運動人士kah一 kóa台灣本島人民有tih走chông，但是，國民黨政權因為伊本身立場ê問題，soah無啥願意替台灣人爭取這个權益，一直延遲kàu 80年代，chiah 得著一人200萬日幣ê賠償，何況日幣是愈來愈薄！
咱真想beh問，敢講，這tō是台灣人ê運命？
既然政府 m̄ 肯鬥saⁿ-kāng，有ê台灣人tō家己......
李雙澤，民歌運動時期ê人物，外省人第二代，28歲時陣(1977.10) tī 淡水海邊，為著救人跳入海底，自按呢無koh再轉來......
若有趣味，歡迎做伙來讀，拜二(14/4)暗時8:00台研社窩(仁102) 。
台 灣 研 究 社 母 語組
（這張用台語文寫ê海報，每一字漢字頂kôan lóng有標羅馬字。另外 koh有出一張北京語版ê。）
5
政治環境ê錯亂，日本統治台灣，後來發動太平洋戰爭，徵召台灣人加入戰爭。1942年開始，「高砂義勇隊」、「陸軍特別志願兵」、「海軍特別志願兵」，一批一批ê台灣人 hō͘ 日本仔送去戰場。有ê iah未kàu目的地，船tō hō͘ 盟軍ê飛行機炸沉去；有ê戰死、iau死、病死。In效忠日本天皇，為著「大東亞共榮圈」 ê號召khong-khong仔獻出家己ê青春kah性命。二十外萬台灣人投入這場莫名奇妙ê戰爭，三萬外人死去。
日本投降，戰爭已經結束......
政治環境ê錯亂，kho͘面桶來kàu台灣，原來ê台灣人日本兵 hō͘ 所有ê人放sat。日本政府無beh chhap，因為in已經m̄是日本國ê人民；kho͘面桶政權 tìⁿ m̄ 知，因為hit時陣中國kah日本是交戰國，in soah kah日本人 khiā tiàm 仝一線，beh 哪會使替in爭取權益？若beh照顧，mā愛照顧hit kóa tè阮ùi中國走路來台灣ê老芋仔。
戰爭是無情ê，不管是對死去、iah是活落來ê人來講。
當事者一个一个倒落去，台灣ê政治環境繼續錯亂......
6
Tī市面上，會tàng chhē著一kóa 華文作品，是tih描寫台灣人ê南洋戰爭經驗，可比李喬ê「寒夜三部曲(三)孤燈」，陳千武ê「獵女犯」，李雙澤ê 「終戰ê賠償」，宋澤萊ê 最後一場戰爭」，吳平城 ê「軍醫日記」，胡台麗ê 「一段被人遺忘的歷史」……等等。這kóa 作品，有ê是作者親身ê經驗，有ê是作者ê親人ê經驗，mā有聽人講了後整理落來ê。
日本人發動戰爭，終戰後，in khah有tih反省這場戰爭，做真chōe ê 資料整理kah思考。比較起來，咱ê華文作品，並無對南洋戰爭做一个全面的、系統的ê整理。 有一條真好聽ê台語歌謠「望你早歸」，tō是tih寫終戰了後，hông送去南洋相戰ê台灣人一批一批仔轉來，m̄-koh家己ê後生、翁婿soah無tī內底，in只有tī基隆、高雄ê港口tiām-tiām仔等待，等待伊ê後生、翁婿會tàng出現在伊面頭前。
黑澤明導演ê電影「夢」，其中第三个夢，已經戰死ê士兵ùi磅空內底行出來，kā隊長講in老母iah-koh tī厝內等伊，hō͘ 我印象chiâⁿ深，無法度放 bōe記。
最近，透過朋友相報，tī 鴻儒堂買著幾本描寫南洋戰爭ê書，大部份lóng是參與戰爭ê台灣人所寫ê，m̄-koh lóng用日文。我想，in 轉來台灣了後無機會koh受華文ê教育（mā有可能是無願意受華文ê教育）。 Tī台灣，看pat日文ê人畢竟有限，in ê作品khah無法度引起ta̍k家ê注意。
7
南洋戰爭，帶走chōe-chōe台灣人ê性命，包括我一个阿伯。南洋戰爭， mā拆散chōe-chōe原本幸福美滿ê台灣人家庭。
雖然教育無kā咱教，我對台灣史有趣味，是按接觸二二八ê歷史開始，後來chiah注意著南洋戰爭。Hō͘ 我有一个感想：對台灣人來講，這兩件代誌lóng是一場惡夢，m̄-koh，伊確確實實是台灣近現代真豐富、真精彩ê一段歷史。Khah早tī戒嚴時期kho͘面桶ê統治之下，研究台灣史iah-koh 是一个禁忌，何況是這兩件代誌。
後來，政治環境慢慢tih改變，khiā tī反對kho͘面桶ê立場來講，二二八事件是一个真理想ê政治訴求，開始有一陣人向禁忌挑戰，hō͘ 二二八得著平反。
Kah二二八比起來，南洋戰爭tō khah無法度得著ta̍k家ê注意，雖然，為著南洋戰爭付出性命ê台灣人無比二二八khah少，雖然，伊mā是台灣ê歷史。
M̄-nā是南洋戰爭，對真chōe台灣ê歷史，咱lóng有需要koh再重認識，koh再重探討、重思考。
假使有一工，台灣順利建國，m̄-koh hit時陣ê台灣人，lóng已經將台灣原來ê語言、文化、歷史放 bōe記a，按呢，咱是beh按怎？