大概tī民進黨政府第一擺執政了後，台灣街仔路漸漸有一寡雄雄看起來用字怪怪，斟酌想才知伊寫啥物ê台語khan-páng。
最近這幾年，台語khan-páng若像有愈來愈濟ê趨勢。台語tī過去數十年國民黨政權ê壓制，禁止tī學校使用，講台語愛掛狗牌、愛罰錢，in koh禁止基督教長老教會台語羅馬字ê聖經佮刊物。一直等到2001年台語進入國小ê正式課程，這个時陣，少年人ê台語能力普遍攏已經無蓋好ah。
雖然為著教學ê需要，教育部有規範羅馬字佮漢字ê寫法，m̄-koh路上看著ê台語khan-páng，並無照教育部ê規範teh行。另外一个看會著台文ê所在是台語歌ê歌詞，伊ê用字有比台語khan-páng khah好淡薄仔，總是mā無完全一致。
雖然已經beh死beh死，台語猶原是台灣人ê生活語言，因為生活需要，自然有書寫台語文ê需求，至少，咱uì台語歌ê歌詞，抑是台語khan-páng圈ntioh這个需要。事實上，台語文ê書寫歷史mā已經有400外冬，只是台灣經過歷史ê斷層，新來ê統治者帶來新ê官方語言，順紲mā kā過去台語文發展ê歷史抹抹掉。
這篇文章beh介紹台語文書寫ê歷史佮現況，用台文來書寫，除了標題m̄是台文以外。
一、台語文書寫歷史
1. 漢字
台語漢字書寫會當uì西元1566年開始算，是tī中國閩南地區ê南管戲文（荔鏡記）。彼陣漢字書寫並m̄是書寫口語，總是南管戲文內底有台語ê詞彙出現。1593年tī馬尼拉（當時受西班牙統治）發行ê《基督要理》，就規篇是台語文ah。
19世紀tī台灣民間社會流傳ê歌仔冊mā是用漢字書寫，歌仔冊使用ê漢字，借音字khah濟。
日本時代官方ê台語書寫，mā是以漢字為主，漢字邊a用修改過ê假名注台語音，日本官方所使用ê漢字，訓讀字比例khah懸。
張學謙指出，用漢字書寫台語，tsia ê漢字會當分做四類：
- 訓讀字（借漢字ê意思）
- 本字
- 借音字（借漢字ê音）
- 本土字（台語特別ê用字，無流通tī其他ê漢字文化圈）
戰後，國民政府一開始ê語言政策是beh消滅台灣本土語言，一直到1990年代尾期才開始有改變。Tī民進黨執政時期，教育部tī 2007年公佈「臺灣閩南語推薦用字（第1批）300字詞」，後來koh公佈第2批kah第3批，加起來攏總700字詞。2008年「台灣閩南語常用詞辭典試用版」上網，到2011年改做正式版。這是官方kā台語漢字書寫行向標準化ê拍拚，總是大多數台灣人tī受教育ê時並無機會學台語書寫，致使民間ê台語書寫到目前iah-koh真混亂、多元。
台語漢字書寫，其中一个khah困擾ê問題是，一个漢字通常有兩个甚至兩个以上ê發音。比一个例，「大人」這个詞根據無仝ê語境，有時是讀「tuā-lâng」，有時讀「tāi-jîn」。教育部雖然有標準化ê拍拚，總是根據台灣閩南語常用詞辭典ê資料來統計，咱來看下面ê例：
- 長：tióng、tiúnn/tiónn、tn̂g/tuînn、tiông、tshiâng、tsióng
- 過：kò、kuè/kè、koh/kù、kòo、kuà
- 籠：lam、lang、láng、lâng、lāng、lông、lóng
- 相：sann、sio、siong、siòng、siōng、siùnn、siunn
- 向：ànn、hiàng、hiànn、hiòng、ǹg
- 龍：lîng、liông、gîng、long、lâng、lông
- 落：lak、làu、loh、lo̍h、lo̍k、la̍uh
- 當：tng、tǹg、tang、tàng、tong、tòng
- 象：siōng、tshiūnn、siūnn、sióng、siòng
- 子：tsí、tsú、jí/lí、á
- 生：sing、senn/sinn、tshenn/tshinn
- 行：hâng、hīng、kiânn、hîng、lîng
- 上：tsiūnn、tshiūnn、siōng/siāng、sióng
- 坪：phiânn、pênn/pînn、phîng、phênn/phînn
- 老：lāu、nóo、ló、láu、lōo
以上遮ê漢字，攏m̄是罕用ê字，mā至少攏有5个無仝ê發音。雖然華文mā有勾破字（破音字），總是無台文hiah-nī困擾。
若檢視台語線頂字典，內底攏總有22,080條，其中有11,635無仝ê漢字，平均一个漢字有兩个讀音。M̄-koh，有ê漢字khah罕用，若kan-na看BIG-5內碼5,401个常用字集ê漢字，其中有5,337無仝ê漢字分佈tī字典其中13,176條，按呢平均起來，一个漢字有2.5个發音。
Tī台灣，因為華文教育普及，逐家看著漢字書寫ê台語文，普遍khah袂排斥，至少袂像紲落來beh講ê羅馬字按呢，掠做羅馬字是外國字，心內會khah驚惶。
2. 羅馬字
Tī幾lō十套台語羅馬字書寫系統內底，咱提khah重要ê白話字（教會羅馬字，下面簡稱POJ）、台灣語言音標方案（簡稱TLPA）：
POJ上早ê文獻，是麥都思（Medhurst） tī 1832年編ê《福建方言字典》，麥都思tī 1820年就編過一本詞彙集，所以POJ有超過190外冬ê歷史。POJ ê出版品包括辭典、宗教作品、報紙、啟蒙讀物、教科書、…等。其中，《Tâi-ôan Hú-siâⁿ Kàu-hōe-pò》（《台灣府城教會報》，這馬改名做《台灣教會公報》）1885年tī台南開始發行，1970年進前ê書寫文字就是POJ，這份刊物是台灣出刊上久ê刊物。
POJ ê文獻誠濟，1913年，甘為霖（William Campbell）真驕傲kā咱講，in用南台灣ê腔口，出版至少700,357頁ê POJ書刊。另外根據呂興昌所執行ê「台灣白話字文學資料蒐集計畫」所蒐集著ê資料來看，戰後POJ書刊猶原繼續出刊，高峰tī 1950、1960年代，後來soah因為政治力ê tshap手，致到tī 1970年代急速衰微，1969年《台灣教會公報》予執政當局全面禁止使用POJ，暫時停刊了後，1970改做華文版。1990年代才koh開始有復興ê影跡，m̄-koh若kah進前相比並，1970年進前出版ê書刊，讀者群以教會為主，而且是全POJ，1990年以後ê台語文出版品，主要讀者群換做社會大眾，而且是漢羅合用成做主流。
蔣為文指出，POJ文化至少包含下面幾項有形、無形資產：(1) 口頭傳說kah表述，包括做為無形文化遺產ê台語kah客語；(2) 由台語kah客語延伸出來ê民間念謠、歌曲kah文學；(3) 白話字精密ê記音功能kah伊留落來ê出版品kap文字印刷工具；(4) 白話字予台灣人有對土地歷史文化ê認同感kah延續感。
台灣語文學會tī 1991年成立，下面設音標小組，in根據一寡標準對現有ê台語拼音符號做評比，結果POJ ê分數上懸。M̄-koh in認為POJ tī彼時陣ê電腦無方便使用，所以beh kā POJ做修改，經過幾擺討論了後定案，號名「台灣語言音標方案」（Taiwan Language Phonetic Alphabet），簡稱TLPA。TLPA原來ê設計，kah POJ ê符號並無衝突，後來1994年教育部召開「鄉土語言輔助教材大綱專案小組」會議，將TLPA ê “ts/tsh”（POJ是“ch/chh”）改做“c/ch”，致使符號衝突。
2001年國校開始有每禮拜一節ê鄉土語言課程，一開始拼音符號並無規範，造成教學上一寡困擾，經過教育部開會討論，2006年10月公佈「台灣閩南語羅馬字拼音方案」，簡稱台羅，會使kā看做是POJ kah TLPA ê混合體（有人講是TLPA ê身軀、POJ ê頭殼）。
張學謙指出，漢字kah羅馬字有互補ê關係，漢字ê一寡缺點（欠表音功能，一个漢字可能有幾lō个發音）會使用羅馬字得著解決，倒頭講mā是按呢（仝一个羅馬字，對應幾lō个無仝意思ê漢字）。
3. 漢羅合用
1970年代，鄭良偉提出漢羅合用ê想法，伊同時mā是實踐者。簡單講，漢字使用上khah無爭議ê，就寫漢字，若無就用羅馬字。Tī 1980年代尾期以後開始khah興旺ê台語文運動，漢羅合用成做主流，大部分ê台語文出版品ê文字型式攏是漢羅合用。
漢羅合用ê羅馬字比例是偌濟？可能無仝作者會有一寡差異，根據台語文語料庫內底ê漢羅文本來計算，羅馬字ê比例佔21.56%。
二、台語文書寫現況
日人時代佮進前，台灣人袂曉講華語，看著漢字袂去聯想著這个漢字ê華語音；這馬無仝，因為教育普及，台灣人普遍攏有受華語ê教育，漢字捌字ê比例真懸，所以看著漢字ê時，先想著ê大概是華語音，m̄是這个漢字ê台語音。70%以上ê使用人口，suah無官方語言ê地位，逐家普遍無機會看著進前ê台語文書寫，m̄-koh現實生活中，koh真想beh用台語文來表達，結果媒體頂面開始出現「凍蒜」、「好野人」等台語詞，如果寫「當選」“tòng-suán”，一般人可能想著ê是華語發音m̄是台語發音，寫「好額人」“hó-gia̍h-lâng”，一般人可能無法度kā「額」轉做台語音，致使m̄知「好額人」ê意思。咱進前所講ê借音漢字，是用仝台語發音ê漢字，這馬kā漢字ê華語發音借來表達台語音，予台語ê漢字使用koh-khah混亂，因為若beh用華語ê發音來表示台語，無論聲母、韻母、聲調攏無夠用。
華語音漢字ê干擾，是目前台語民間書寫誠普遍ê情形，除了進前ê例，「現挽的荔枝」“hiān bán ê nāi-tsi”寫做「很慢ㄟ奶雞」，「垃圾」“lah-sap”寫做「辣剎」，「腹肚枵」“pak-tóo iau”寫做「八度腰」，「你的車」“lí ê tshia”寫做「利爺車」，「食飯」“tsia̍h-pn̄g”寫做「甲奔」，雖然會曉台語ê人大概攏臆會出來，總是漢字烏白鬥ê情形實在是不止仔嚴重。
華語音漢字ê干擾是一个真為難ê問題，一方面，這予咱看著台語文ê需求，表示雖然過去真長ê時間台語受著無情ê打壓，總是目前台灣人對這个語言猶原有誠深ê感情，這是台語文ê希望；m̄-koh若換一个角度，tī無法度脫離漢字ê情形下，因為教育ê關係，漢字已經予華語獨佔去ah，大多數人看著漢字會先想著華語，袂去想著台語，所以台語書寫若用漢字，koh愛面對漢字混亂ê問題，漢字書寫若混亂，對台語文標準化koh是傷害。
漢字文化圈ê所在若beh放棄漢字，需要有政治力量，現實ê例包括日本、韓國佮越南，日本猶閣有真濟漢字，韓國真少ah，越南攏無，除了政治力量koh需要時間。中國捌有想beh廢漢字，可能時間無夠充足，結果並無成功。台語無政治力量，所以台語文字化ê過程，若beh廢漢字，以目前ê時勢暫時應該是無可能。無可能廢漢字，就愛面對漢字混亂這个問題。
三、台語ê困境
使用人口上濟ê語言，無予執政者訂做官方語言，除了受殖民統治，世界上大概揣無這款例。因為世界政治ê因素，台灣雖然有政治實體，聯合國suah無承認台灣是一个國家。生活tī台灣ê人，普遍無認為台灣是殖民地，m̄-koh台語tī台灣ê處境， koh有符合殖民地ê特點，這的確是真特殊ê情形。
日本時代，台灣開始行向現代化，統治者辦教育，m̄-koh教學語言是國語（日語）。國民政府時代，教學語言仝款是國語（華語），入學考試抑是國家考試攏愛考國文（華文），利用政治力提升華語文ê地位，kā欠缺華語文能力ê人排除tī體制外（受完整日本教育ê台灣人是主要受害者）。1950年代了後，進一步沒收教會ê台語聖經，限制台語tī學校kah媒體ê使用，教育學生講台語是無水準ê方言，tī學校講台語愛罰錢抑是掛狗牌。
教育體制方面，1987年解嚴了後，本土意識漸漸浮頭，1990年代初期，ùi民進黨執政ê縣市開始利用非正式課程ê時間（社團活動）開鄉土課程，1996年國小三年到六年設「鄉土教學活動」，其中包括鄉土語言教學，2001年鄉土語言（後來改名叫做本土語言）成做國小一年到六年ê正式課程。M̄-koh一禮拜kan-na一節，而且實施十外冬以後，師資iah-koh是真大ê問題。
真濟無受本土語言專業教學訓練、無通過本土語言認證ê現職老師teh教本土語言課，教育部tī 2013年發公文予國小，要求ùi 2016年開始（成做正式課程ê 15冬後）現職教師若beh教台語，一定愛通過教育部台語語言能力認證中高級才會使教。另外有一批體制外ê台語支援老師，教育部稱呼in是教學支援人員，是領鐘點費來教台語課ê老師，薪水低，工課mā無啥保障。2000年民進黨執政了後，開始鼓勵大學設台灣文史相關系所，包括台灣歷史、語言、文學、文化ê系所，總是，有足額台語教學專業課程ê系kan-na少數，遮ê受過專業台語教學訓練ê學生畢業了後，就算通過教師考試，mā因為少子化ê關係，大部分無法度成做正式教師入去國小教台語，提培養國小台語師資ê台中教育大學台灣語文學系做例，到2016年已經將近100位畢業生通過國小教師資格檢定，mā通過台語檢定中高級，m̄-koh國小正式教師無超過10位。
政治體制方面，行政院tī 1996年設原住民委員會，2001年成立客家委員會，獨獨台語人無委員會，這反應tī各族群語言教育資源分配方面，台語ê部分是上少ê。
Tī台灣，雖然台語人口iah是khah有優勢ê，台語mā無hőng當做瀕危語言，m̄-koh無仝世代，台語使用情形有明顯ê差異，愈少年，台語使用mā愈少。葉高華指出，中央研究院社會學研究所2003年執行ê台灣社會變遷調查第四期第四次，問卷內底其中一條問題是：「請問在家裡，您最希望您的小孩跟您說哪一種話？」2016份問卷統計出來ê結果，予人感覺真驚惶，1981-1990出世ê人，in大漢了後成家，願意kah in ê囡仔講台語ê，已經無到20%。
四、面對困境，咱欲按怎做
目前，全世界大概有4千8百萬人會曉講福建話、台語，主要是分布tī南中國海週邊ê國家，包括台灣、中國福建、新加坡、馬來西亞、越南、汶萊、…等等，其中，tī台灣，台語人口比例差不多有70%，是比例上懸ê。
目前中國政府為著統治ê利便，強力推行普通話，造成中國福建會曉講福建話ê少年人suah愈來愈少。目前全世界唯一對台語建立系統性教育ê，就kan-na台灣。台語雖然予國民黨政權𧿬踏甲強beh khiau去，總是經過真濟人ê拍拚，咱有kā教育系統建立起來，mā成做中國、馬來西亞等國家beh推sak福建話ê時，會當學習、模仿ê來源（雖然中國tī福建地區推sak福建話可能是為著對台灣ê統戰）。
一種語言，代表一个文化，一種語言ê消失，就代表一个文化ê消失。台語ê未來，我個人並無真樂觀，總是，猶無到絕望ê地步。可能受著長期政治、教育體制ê洗腦，就算民進黨政府重新執政，官方立場可能只是對台語ê相關議題khah友善，並無表現挽救台語ê決心。
總是，假使咱對咱ê母語koh有感情，無想beh予咱ê語言死tī咱ê手頭，成做謀殺家己母語ê共犯，咱至少會使愛uì家己做起，加使用台語，學習台語文，加佮序細講台語，鼓勵朋友用台語來表達；進一步，若是有機會，就愛去影響政府ê決策。