GIANT鯉魚潭店本底是花蓮縣水產培育所，這馬猶原是。
Chi-àn-tò͘ Lí-hî-thâm-tiàm pún-tóe sī Hoa-liân-kōan chúi-sán pôe-io̍k-só͘, chit-má iû-gôan sī.
捷安特鯉魚潭店原來是花蓮縣水產培育所，現在還是。
店ê對面就是玉山神學院，幾個前院長攏算是原住民ê意見領袖。毋過我感覺，改做羅馬字會當koh-khah凸顯主體性。
Tiàm ê tùi-bīn tō-sī Gio̍k-san sîn-ha̍k-īⁿ, kúi-ê chêng īⁿ-tiúⁿ lóng sǹg sī gôan-chū-bîn ê ì-kiàn léng-siù, M̄-koh góa kám-kah, kái chò Lô-má-jī ē-tàng koh-khah tu̍t-hián chú-thé-sèng.
店的對面就是玉山神學院，幾位前院長都算是原住民的意見領袖。不過我覺得，改成羅馬字更凸顯主體性。
Koh看一擺百葉山。頭前ê路，其實是勻勻仔peh崎，只是翕袂出這個效果。目前tī台九丙線。
Koh khòaⁿ chi̍t-pái Pah-hio̍h-soaⁿ. Thâu-chêng ê lō͘, kî-si̍t sī ûn-ûn-á peh-kiā, chí-sī hip bōe chhut chit-ê hāu-kó. Bo̍k-chêng tī Tâi-káu-piáⁿ-sòaⁿ.
再看一次百葉山。眼前的路，其實是緩慢爬坡，只是拍不出這個效果。目前在台九丙線。
勻勻仔peh崎koh勻勻仔落崎了後，看著這個牌仔。過牌仔頭前一絲仔，斡正爿入去小路。
Ûn-ûn-á peh-kiā kho ûn-ûn-á lo̍h-kiā liáu-āu, khòaⁿ-tio̍h chit ê pâi-á. Kè pâi-á thâu-chêng chi̍t-si-á, oat chiàⁿ-pêng ji̍p-khì sió-lō͘.
緩慢爬坡再緩慢下坡後，看到了這個牌子。過這個牌子後沒多久，右轉進入小路。
宏卿山莊，10幾冬前捌tòa過一暗，不止仔舊。遮有一寡仔徛家，若有插路凊彩行無要緊，到時會接做伙。
Hông-kheng san-chong, cha̍p kúi tang chêng pat tòa kè chi̍t àm, put-chí-á kū. Chiâ ū chi̍t-kóa khiā-ke, nā ū chhah-lō͘ chhìn-chhái khiâ bô iàu-kín, kàu-sî ē chiap chòe-hé.
宏卿山莊，10幾年前曾住過一晚，滿老舊的。這裡有一些住家，如果有叉路隨便騎沒關係，到時候會接在一起。
看著這塊牌仔，就知影欲peh崎a。這段路，基本上是沿木瓜溪南爿開--ê。
Khòaⁿ-tio̍h chit tè pâi-á, tō chai-iáⁿ beh peh-kiā --a. Chit tōaⁿ lō͘, ki-pún-siōng sī iân bo̍k-koe-khoe lâm-pêng khui--ê.
看到這個牌子，就知道要上坡了。這段路，基本上是沿著木瓜溪南岸。
我tī peh崎ê半路停落來翕相，下面是木瓜溪ê溪谷，遠遠ê山崙是美崙山。
Góa tī peh-kiā ê pòaⁿ-lō͘ thêng lo̍h-lâi hip-siōng, ē-bīn sī Bo̍k-koe-khoe ê khoe-kok, hn̄g-hn̄g ê soaⁿ-lūn sī Bí-lūn-soaⁿ.
我在上坡的半路停下來照相，下面是木瓜溪溪谷，遠遠的山丘是美崙山。
Koh看一kái百葉山，十點外，雲已經起來a。
Koh khòaⁿ chi̍t kái pah-hio̍h-soaⁿ, cha̍p tiám gōa, hûn í-keng khí--lâi a.
再看一次百葉山，10點多，已經有雲霧了。
五khí-lò͘ ê牌仔。
5 khí-lò͘ ê pâi-á.
五公里的牌子。
Koh複習一kái奇萊連峰ê雪。
Koh hok-si̍p chi̍t kái Kî-lâi liân-hong ê seh.
再複習一次奇萊連峰的積雪。
另外一個角度ê百葉山。
Lēng-gōa chi̍t ê kak-tō͘ ê Pah-hio̍h-soaⁿ.
另外一個角度的百葉山。
六khí-lò͘ ê牌仔。
6 khí-lò͘ ê pâi-á.
六公里的牌子。
路邊是菅芒。
Lō͘-piⁿ sī koaⁿ-bang.
路邊是蘆葦。
大落崎了後彎出來，頂面是鐵枝路，koh頭前就是台九線。
Tōa lo̍h-kiā liáu-āu oan--chhut-lâi, téng-bīn sī thih-ki-lō͘, koh thâu-chêng tō sī Tâi-káu-sòaⁿ.
大下坡之後彎出來，上面是鐵路，再前面就是台九線。
這是這段路ê地圖。
Che sī chit tōaⁿ lō͘ ê tōe-tô͘.
這是這一段的地圖。
