Chit kúi-kang-á chhut-khì kiâⁿ-kiâⁿ--leh, khòaⁿ-tio̍h chin-chōe Chiau-hô-chháu. Chiau-hô-chháu sī chi̍t-sì-kòe lóng khòaⁿ-ē-tio̍h ê chháu-á, âng-sek ê hoe-lúi, koh ū pe̍h-sek ê mî-kiû. 這幾工仔出去行行咧，看著真濟昭和草。昭和草是一四界攏看會著ê草仔，紅色ê花蕊，閣有白色ê棉球。
Ūi-siáⁿ-mé kiò-chòe chiau-hô-chháu? Kî-si̍t i m̄-sī Tâi-ôan ê gôan-seng si̍t-bu̍t, Lâm-iûⁿ chiàn-cheng khai-sí liáu-āu, chi̍t khai-sí Ji̍t-pún ê kok-sè sui-jiân chin kiông, tān-sī kio̍k-sè tùi Ji̍t-pún jú-lâi-jú put-lī, Tâi-ôan chin ū khó-lêng pìⁿ-chòe chiàn-tiûⁿ. 為啥物叫做昭和草? 其實伊毋是台灣ê原生植物，南洋戰爭開始了後，一開始日本ê國勢雖然真強，但是局勢對日本愈來愈不利，台灣真有可能變做戰場。
Só͘-í Ji̍t-pún lâng kiò Tâi-ôan-lâng khai-sí ó͘ tōe-tōng, ó͘ chiàn-kau......, lēng-gōa chi̍t-hong-bīn, i iōng hui-hêng-ki iā chháu-á-chí, tio̍h-sī chiau-hô-chháu ê chháu-á-chí, in-ūi chiau-hô-chháu ê sek-èng-le̍k chin kiông, só͘-í soah chi̍t-sì-kòe lóng ū. I ê miâ mā-sī an-ne lâi--ê. Ūi-siáⁿ-mé beh iā chiau-hô-chháu ê chháu-á-chí ? in-ūi i kui-châng lóng ē chia̍h--ê, Ji̍t-pún-lâng tih siūⁿ, ká-sú Tâi-ôan pún-tó hoat-seng chiàn-cheng, Tâi-ôan-lâng cháu khì soaⁿ-téng, an-ne chì-chió bōe iau--sí. 所以日本人叫台灣人開始挖地洞、挖戰溝……，另外一方面, 伊用飛行機掖草仔子，就是昭和草ê草仔子，因為昭和草ê適應力真強, 所以煞一四界攏有。伊ê名嘛是按呢來ê。為啥物欲掖昭和草ê草仔子? 因為伊規欉攏會食ê，日本人teh想, 假使台灣本島發生戰爭, 台灣人走去山頂，按呢至少袂枵死。
Sui-jiân góa chin bô-ài Tâi-ôan hō͘ Ji̍t-pún kài-kóan, tān-sī ta̍k piàn khòaⁿ-tio̍h chiau-hô-chháu, tio̍h ē kám-kah, kî-si̍t Ji̍t-pún-lâng tī thóng-tī Tâi-ôan ê sî-chūn, i ū jīn-chin tih keng-êng chit-ê só͘-chāi, mā chin ū lâng-bī. 雖然我真無愛台灣予日本界管，但是逐遍看著昭和草，就會感覺， 其實日本人佇統治台灣ê時陣, 伊有認真teh經營這个所在，嘛真有人味。
Góa soah hiông-hiông siūⁿ-tio̍h chi̍t-ê chhù-bī ê būn-tôe : ká-sú Tâi-ôan hoat-seng chiàn-cheng, an-ne, kho͘-bīn-tháng chèng-kôan ē lâu hō͘ lán Tâi-ôan-lâng siáⁿ-mé mi̍h-kiāⁿ? 我煞雄雄想著一个趣味ê問題：假使台灣發生戰爭，按呢，國民黨政權會留予咱台灣人啥麼物件?